СТРУМИЦА ДЕНЕС: Посетителите на саемот во Торино воодушевени од македонската традиционална кујна

Специфичниот вкус и мирис на колешинските кикиритки, гевгелиското слатко од диви смокви, струмичкиот собра грав, буковската пипер итн. Ги намамија странските посетители на саемот “Салон дел густо” во Торино, не само да пробаат од македонските традиционални производи, туку и да купат, да понесат дома за своите трпези.
Тие се водушевени од автентичноста, од зачувувањето на старите рецепти кои до денес се негуваат.
Според Сашко Поповски од Босилово, производител и член на локалната заедница “Огражден”, тоа што го прави собра гравот поинаков е специфичноста на подбеласичкиот регион.
– Собра гравот го произведувале нашите дедовци и ние денес ја продолжуваме традицијата, не дозволуваме да исчезне, истакна Поповски.

Производителите сметаат дека Македонија треба повеќе да води грижа за традиционалните производи.
– Многу од производите не се доволно заштитени и се случува да ни ги “украдат”. Како да сме индиферентни кога станува збор за нивното зачувување, посочи Кимов. И Поповски потенцира дека традиционалните рецепти треба да се сочуваат. – Некои се веќе исчезнати, како белмачот – производ со сладок вкус добиен од млеко собрано во мај, јуни и јули, кога пашата е најбогата, рече прозиводителот на собра гравчето.

Годинашниот “Салон дел густо” се одржува во пет хали од кои три се резервирани за италијанските павиљони. Меѓународниот павиљон е во т.н. Голема овална сала. Саемот ги запазува стандардите на одржливост. Сите материјали од кои се направени штандовите се еколошки (дрво и картон), без никакво штетно влијание за средината, и се повеќекратно употребливи понатаму, за други намени.
Македонија е застапена со свој посебен штанд, но и на уште еден, заедно со останатите земји од регионот вклучени во проектот ЕСЕДРА.
http://strumicadenes.mk/posetitelite-na-saemot-vo-torino-vooduseveni-od-makedonskata-tradicionalna-hrana/