Ова е време за семејството, за веселби и за храна, многу храна. Забавите и патувањата ги нарушуваат секојдневните рутини, а сето тоа трае со недели. Но, сепак, здравјето треба да е приоритет. Со цел спречување на потенцијални здравствени проблеми, треба да сме попретпазливи со внесот на храна за време на новогодишните празници.Треба да се избере и понуди таква храна, со која, колку што е можно, ќе се придржуваме до здравата храна што вообичаено би ја избрале.
Пребирливоста не е маана во овој период. Не јадете сè на гозбите и забавите. Не прескокнувајте оброци за да јадете за време на гозбата или забавата. Така ќе е потешко да го контролирате шеќерот во крвта, ќе бидете навистина гладни и веројатно вечерта ќе се прејадете. Одделете 30-45 минути за пешачење. Јадете ниско-калорична храна за време на поголемиот број на оброци овие денови. Јадете блиску до вообичаеното време за оброк за да го одржувате шеќерот во крвта на стабилно ниво. Ако вашиот оброк се служи подоцна од вообичаеното, јадете мала закуска во вообичаеното време за да јадете помалку кога се служи оброкот на настанот на кој присуствувате. Избегнувајте пржена храна, наместо таква, подгответе или изберете да јадете варена или храна печена во фурна. Избегнувајте го пиењето алкохол, особено доколку пиете лекови бидејќи многу често алкохолот стапува со содејство со лековите. Доколку сепак консумирате алкохол, количината треба да е умерена и да не е на гладно. Алкохолот го зголемува Вашиот апетит и ја намалува способноста за контрола над тоа што го јадете.
Ако на менито има слатка храна, намалете ги другите јаглехидрати (како компири и леб) за време на оброкот. Избегнувајте ги засладените газирани пијалаци, не се залажувајте дека ќе ви помогнат за варење на веќе внесената голема количина храна. Јадете полека. Потребни се најмалку 20 минути за вашиот мозок да сфати дека сте сити.
Намалениот сон, може да го отежне справувањето со шеќерот во крвта, а заради недоволното спиење, ќе ви се зголеми желбата за внес на храна богата со масти и шеќери. За да се заштитите од нерационален внес на храна, потрудете се да спиете меѓу 6 и 8 часа навечер.
Фокусирајте се повеќе на забавата, а помалку на храната.
И секако, сè уште живееме во пандемија, а присуството на варијанта со голема преносливост, како омикрон, не ни помага. Затоа, би било добро да избереме начин на прославување со кој ќе може да уживаме во храната, а во исто време да не го загрозиме своето и здравјето на нашите сакани.
Одделението за исхрана и здравствено-хигиенски прегледи при Институтот за јавно здравје Ви посакува среќни и здрави празници.
Препорака на Одделението за исхрана и здравствено-хигиенски прегледи при Институтот за јавно здравје
