Домашен ајвар, вино, мед, ѓомлезе, сирење беа само дел од производите кои што битолчани можеа да ги пробаат и вкусат викендов на првиот „Пазар на локални производители“. На „Пазарот на Фармери“ учество зедоа околу петнаесеттина производители на разновидна органска храна. Настанот го организираше „Слоу Фуд- Битола“ во соработка со „ЈП Пазари“ Битола.
-Ова е концепт кој што е развиен од нашата матична организација “Слоу-Фуд“ од Италија кој што се организира години наназад, па еве сега ние решивме да го пренесеме тука. Идеата е локалните фармери кои што тука произведуваат во битолскиот регион и кои поради обврски неможат да продаваат на пазарот, да дојдат тука во еден ден да ги претстават своите производи на посетителите, рече Елена Каровска од Слоу – Фуд- Битола.
Со млечни производи произведени од својата фарма во Дихово на пазарот го сретнавме Игор Поповски. Вели дека битолчани го препознаваат квалитетот и задоволен бил од продажбата.
-Произведувам сирење и кашкавал, работата е доста специфична и те обврзува по цел ден , но граѓаните го ценат квалитетот рече, Поповски.
На првиот „Пазар на фармери“, посетителите имаа можност на лице место да ја пробаат храната подготвена од готвачот Пеце Клечкароски од Струга. Освен што готвеше специјалитети, посетителите можеа да го пробаат и вкусат неговиот домашен намаз од лешник.
-Путерот од лешник е мој личен специјалитет, ми дојде идеја да направам на почеток само чоколаден путер со лешник, а потоа креативниот процес еволуираше, рече Пеце Клечкароски.
Покрај органската храна имаше и природна органска козметика направена во фармацевтска лабараторија во Битола.
-Правиме различни производи од органски состојки, креми и сапуни со органово масло и пчелин восок. Тука се вбројува и путерот за тело и мелемот за детска кожа. Нашата идеја беше да направиме нешто природно, а не со хемикалии, рече Ангела Пандовска.
На овај прв „Пазар на фармери“ не беа заборавени и најмладите. За нив организаторите имаа подготвено едукативен час за тоа како да ја препознаат здравата храна.
ВЕСНА ШЕРОВСКА
Објавено на: 17/09/2018
Медиум: https://tera.mk/